بلاول بھٹو 240

آرمی چیف کی تعیناتی پر بحث غیر ضروری ہے، بلاول بھٹو

چیئرمین پاکستان پیپلز پارٹی (پی پی پی) بلاول بھٹو کا کہنا ہے کہ آرمی چیف کی تعیناتی پر بحث غیر ضروری ہے۔

بلاول بھٹو نے کراچی میں تقریب سے خطاب کرتے ہوئے کہا کہ افسوس ہے آرمی چیف کی تعیناتی پر غیر ضروری سیاست کی جا رہی ہے، ہمارے کسی اتحادی یا کسی کو بھی جلسوں میں ایسی باتیں نہیں کرنی چاہئیں۔

چیئرمین پاکستان پیپلز پارٹی بلاول بھٹو نے کہا کہ اس تعیناتی کے عمل کو آئین اور قانون کے مطابق مکمل ہونا چاہیے۔

(پی پی پی) چیئرمین کا کہنا تھا کہ خان صاحب کی سیاست شروع دن سے آج تک اس ایک تعیناتی کے گرد گھوم رہی ہے۔

انہوں نے کہا کہ ہم سیاسی بیان بازی پر نہیں خدمت پر یقین رکھتے ہیں، سب کی ترجیح ملک اور اس کی خدمت ہونی چاہیے۔

بلاول بھٹو کا کہنا تھا کہ پاکستان بہت سارے مسائل سے گزر رہا ہے، کورونا، یوکرین روس جنگ اور موسمی تبدیلیاں ہمیں متاثر کر رہی ہیں، سیلاب کے باعث 3 کروڑ 30 لاکھ پاکستانی متاثر ہوئے۔

(پی پی پی) چیئرمین نے کہا کہ سیلاب کے اثرات معیشت اور بجٹ پر بھی ہیں، آج تک ہم معیشت کے اثرات کو بھگت رہے ہیں۔

بلاول بھٹو نے کہا کہ میں بہت خوش ہوں کہ سندھ میں جگر کے علاج کی سہولت مفت دی جا رہی ہے، ہمارا تو مقصد ہی یہی ہے کہ عوام کو مفت سہولتیں فراہم کی جائیں۔

بلاول کا کہنا تھا کہ جگر کے علاج کے لیے لوگوں کو باہر جانا پڑتا تھا، علاج بہت مہنگا ہے، غریب عوام یہ علاج نہیں کروا سکتے۔

بلاول بھٹو نے کہا کہ جگر کی پیوندکاری کے لیے سندھ حکومت نے فنانسنگ کا بندوبست کیا، ہر ضلع میں دل کے علاج کے لیے سہولت موجود ہے۔

چیئرمین پاکستان پیپلز پارٹی نے مزید کہا کہ انشااللّٰہ اسپتال کی سہولتوں میں مزید اضافہ کیا جائے گا، ہماری کوشش ہوگی لوگوں کو زیادہ سے زیادہ سہولت دیں۔

اس خبر پر اپنی رائے کا اظہار کریں

اپنا تبصرہ بھیجیں